ټاکل شوې چې د ازبکستان حکومت یو پلاوی په را روان میاشتو کې، د قوشتیپې کانال په اړه خبرو اترو لپاره افغانستان ته سفر وکړي.
د ازبکستان کازتاوز ورځپاڼې پرون «پنجشنبه د اکتوبر ۱۹مه» ليکلي، چې د دې سفر موخه د قوشتېپې کانال د منفي اغيزو په اړه له افغان چارواکو سره خبرې اترې دي.
ورځپاڼې د دې هېواد د سرخان دريا د والي الغبېک قسيموف له قوله لیکلي، چې دا خبرې به د روان کال له پای ته رسېدو مخکې افغانستان کې تر سره شي.
د ازبکستان دولتي رسنیو د قوشتېپې کانال جوړول د اوسني حکومت له خوا یو هوښیار اقدام بللی او ویلي یې دي چې دې اقدام په منځنۍ اسیا کې د اوبو امنیت له خطر سره مخامخ کړی دی.
کابل ته د ازبکستاني پلاوي سفر په داسې حال کې پلان شوی، چې سرپرست حکومت تېره اوونۍ د قوشتېپې کانال لومړی فاز رسماً پرانېست او د دويم پړاو د کار د پيل اعلان یې وکړ.
افغان چارواکو د لومړي فاز د پای ته رسېدو په مراسمو کې وويل، چې د قوشتېپې کانال په جوړېدو کې د هېڅ هېواد د اوبو حق نه خوري؛ خو خپله برخه اوبه مديريت کوي.
دوی ډاډ څرګند کړ، چې په هر ډول شرايطو کې به د قوشتېپې کانال چارې بشپړوي.
دغه کانال چې ټاکل شوې د بلخ ولایت له کلدار ولسوالي څخه د فاریاب ولایت تر اندخوی ولسوالي پورې، د ۲۸۵ کیلومترو په اوږدوالي جوړ شي، د امو سیند د اوبو لویه برخه به د افغانستان نورو شمالي سیمو ته وغځوي.
د اټکل له مخې دا کانال ۵۵ زره جريبه کرنيزه ځمکه خړوبوي.
