د رياست الوزرا اقتصادي معاونيت پر خپله اېکس پاڼه ليکلي، د دغه رياست سرپرست د افغانستان لپاره د ايران له ځانکړي استازي او کابل کې د ياد هېواد له سفیر حسن کاظمي قمي سره ليدلي دي.
په دغه ليدنه کې د کرنې او مالداري، اوبو او انرژۍ، د اطلاعاتو او کلتور وزيرانو او په تهران کې د افغانستان سفير هم ګډون کړی وو.
د سرچينې په خبره په دغه ليدنه کې د سیاسي، اقتصادي، سوداګريزو او ټرانزیټي ستونزو پر پياوړتيا او همکاريو خبرې شوي دي.
اقتصادي مرستيال د ايران او افغانستان اړيکې مثبتې بللي او د دوام لپاره يې پر دوه اړخيزه همکاري ټينګار کړی دی.
نوموړي ويلي، د وروستيو ورښتونو له امله د هلمند اوبه تر سيستان ورسېدې چې په دې سره به د دواړو لوريو د ولسونو ستونزې حل شي.
ده همداراز ويلي، له دغه هېواده دې اروپا ته د تېرېدونکو افغان ترانزيټي توکو په برخه کې اسانتيا رامنځته شي او په خبره يې، دغه چاره به د دواړو هېوادونو ترمنځ د سوداګري کچه لا لوړه کړي.
سرچينه زياتوي، په دغه ليدنه کې په ايران کې د مېشت افغان کډوالو خبرې شوي او له ايران غوښتنه شوې ترڅو په دغه هېواد کې مېشت کډوال له خپلې خاورې ونه وباسي.
ورته مهال بیا قمي ايران ته د افغانستان د اوبو په رسېدو خوښي څرګنده کړې او ويلي يي دي، هېواد يې چمتو دې ترڅو له افغانستان سره د سوداګرو د بانکي ستونزو په حل، د چاپيريال ساتنې پر وړاندې د ګډې مبارزې، د کرنې سکټور د عصري کولو او همداراز د سوداګرۍ او ترانزيټ د کچې په زياتولو کې مرسته وکړي.
