د رياست الوزرا له اقتصادي معاونيت څخه په يوه خپره شوې خبرپاڼه کې راغلي، د سرپرست حکومت اقتصادي مرستيال عبدالغني په ايران کې د دغه هېواد له بهرنيو چارو وزير امير عبداللهیان سره ليدلي.
دوی په دغه ليدنه کې په سياسي، اقتصادي، ښوونيزو او کلتوري مسايلو خبرې کړي.
اقتصادي مرستيال ويلي، ايران او افغانستان د تاريخ په اوږدو کې دوه دوست هېوادونه پاتې شوي او له يو بل سره ښې اړيکې لري او پکار ده، چې د دغه اړيکو د لا پراختيا لپاره کار وشي.
هغه ويلي، د دواړو هېوادونو د سوداګرۍ او ترانزيت د پراخوالي په موخه دې د ويزو په ورکړه کې اسانتیاوې، افغانستان کې د ايراني پانګوالو لپاره اسانتياوې، په ايران کې د مېشت کډوالو د ستونزو له منځه وړل او تخنيکې کمېټو په جوړولو ټينګار کړی.
نوموړي ويلي، افغانستان غواړي د ايران له لارې افغاني صادرات او واردات زيات کړي؛ نو له ايران څخه غواړو، چې په دې اړه د پام وړ اسانتياوې برابرې کړي.
د ايران د بهرنیو چارو وزير عبداللهيان وويل، دوی به د دواړو هېوادونو ترمنځ د سوداګرۍ په پراخوالي، په صادراتو او وارداتو کې د اسانتياوو رامنځته کول، په مختلفو سکټورونو کې ګډ کار کول، د کمېټو په جوړېدو، په ايران کې د افغان کډوالو ستونزو ته رسيدګي او په افغانستان کې د ايراني پانګوالو له لوري پانګونې ډاډ ورکړی.
دوی همداراز د واخان کوريډور پر جوړولو او له دې لارې څخه پر استفادې دواړو لوريو ټينګار وکړ او ياده لار يې د دواړو هېوادونو لپاره مهمه وبلله.
