د مالیې وزارت د ګمرکونو لوی ریاست وایي، فاریاب ولایت کې اقینې په ګمرک کې د ۷۴ میلیونه او ۷۹۴ زره افغانیو په ارزښت د پارکینګ د کانګرېټ کولو، د چاپېر دېوال او ټاورونو د رغولو چارې پیل شوې دي.
د سرچینې په وینا په اقینې ګمرک د پارکینګ جوړولو پر پروژې ۲۹ میلیونه او ۹۹۹ زره میلیونه افغانۍ لګښت کیږي چې په ۵.۵ جریبه ځمکه به جوړ شي.
دغه راز سرچینه وایي، د یاد ګمرک د چاپېر دېوال او ټاورونو د جوړېدو پر پروژې ۴۴ میلیونه او ۷۹۵ زره افغانۍ لګښت کیږي چې چارې به یې راتلوونکو لسو میاشتو کې بشپړې شي.
یاد وزارت وایي، د یادو پروژو لګښت د مالیې وزارت له پراختیایې بودیجې څخه ورکول کېږي او په بشپړېدو سره به سوداګرو او د ګمرک کارکوونکو ته ګڼي اسانتیاوي رامنځته شي.
