د مخکني ولسمشر لومړي مرستيال امرالله صالح پر خپله اېکس پاڼه ليکلي، هغه ورځ راتلونکې ده چې احمد مسعود اوسنی حکومت نسکور کړي، وطن ته لاړ شي او د الله اکبر په ناره د خپل پلار احمد شاه مسعود د قبر څنګ ته کیني.
ده همداراز ويلي، احمد مسعود به پلار ته ووايي: «ستا نوم مې په ځمکه ونه غورځاوه، راغلم چې عزت دې لوړ کړم، خلک دې نور په بند کې ندي او ما مې په خپلې وعدې وفا وکړه.»»
بلخوا بیا د مخکني حکومت د کورنيو چارو وزير مسعود اندرابي د صالح دغه څرګندونې بېځايه بللي او ده ته يې د ششونيم چکچکي خطاب کړي دی.
ده ويلی، صالح يې هغه مهال له پامه بد شو چې د ده په شتون کې يې د کابل امنيت واخيست او شپږ نيمې بجې به يې غونډې کولې.
اندرابي همداراز د مقاومت په جبهه کې د پراخ فساد د شتون ادعا کړې او ويلي يې دي، دغه جبهه کې خپلوي پالل کيږي او غلاوې پکې روانې دي.
اندرابي له يو خصوصي تلويزون سره په مرکه کې ويلي، د تېر جمهوریت پر مهال ولسمشر غني راته د پښتنو د قاتل خطاب وکړ.
ده همداراز ويلي، په حکومت کې پراخ فساد موجود و او قام پالنه پکې روانه وه.
دی زیاتوي، د ملي امنيت سلاکار ورته د ۲۲ نفرو تاجکو لیست ورکړ او ويې ويل چې دغه کسان دې د ولسمشر په حکم له دنده منفک کړه.
