د سپينې ماڼۍ د ملي امنيت شورا وياند جان کربي وايي، که د افغانستان اوسني مسوولين غواړي، چې حکومت یې په رسميت وپېژندل شي، بايد چې خپلې کړې ژمنې پوره او افغان مېرمنو او نجونو د کار او زده کړې حق ورکړي.
هغه له امريکا غږ سره په خبرو کې ويلي، چې دوی اوسمهال «طالبان» د افغانستان د حکومت په توګه نه پېژني.
هغه زياته کړې: « مونږ طالبان د افغانستان د حکومت په توګه نه پېژنو. که طالبان غواړي، په رسميت وپېژندل شي. که غواړي چې د یو مشروع حکومت په سترګه ورته وکتل شي؛ نو بايد خپلې ټولې ژمنې نجونو ته د زده کړو او کار د اجازې ورکولو په ګډون پوره کړي.»
په همدې حال کې، افغانستان لپاره د امريکا متحده ایالاتو ځانګړی استازی توماس وسټ د افغان نجونو د زده کړو حق، د افغانستان داخلي موضوع ګڼي.
وسټ د امريا په اسټمسن څېړنيز مرکې کې د خبرو پر مهال ويلي، که ټاکل شوي وي، چې افغان نجونو ته د ښوونځيو او پوهنتونو د تګ اجازه ورکړل شي؛ نو بايد دا کار د افغانستان له داخل څخه وشي.
له تېرو دوه کلونو راهيسې، افغانستان کې له شپږم ټولګي پورته د نجونو ښوونځي تړلي دي. سرپرست حکومت هدا راز د خپلې واکمنۍ په دويم کال پوهنتونو ته د نجونو تګ هم تر امر ثاني وځنډاوه او په موسساتو کې یې د ښځو پر کار بنديز ولګاوه.
د اوسني حکومت دا اقدام د کورنيو غبرګونو تر څنګ نړيوال غبرګونونه هم راپارولي دي.
خو مسوولان وايي، چې دا موضوع موقتي ده او ورته د حل لارې د لټولو په فکر کې دي.
د لوړو زده کړو وزارت سرپرست د چهارشنبې ورځ (د سپتمبر ۱۳مه) د افغانستان له ملي تلوېزيون سره په مرکه کې وویل، چې د افغان نجونې دې حوصله وکړي او دوی یې د ټولو حقونو ورکړې ته ژمن دي.
