د پاکستان د سرپرست حکومت لومړی وزير انورالحق کاکړ ادعا کوي، چې د افغانستان سرپرست حکومت له ځانګړو تروريستي ډلو سره د مبارزې وړتيا نه لري.
هغه له ترکي رسنۍ نیوز مېکر سره په مرکه کې دا هم ويلي، چې پاکستاني طالبانو د تحريک غړي په افغانستان کې وجود لري.
نوموړي زياته کړې: « ځينې ډلې لکه د پاکستاني طالبانو تحريک د افغانستان په خاوره کې شتون لري او مونږ دا موضوع له هغوی سره شريکه کړې ده.»
نوموړي ويلي نه شي ويلای، چې دا ډلې به حتمي د حکومت ملاتړ له ځان سره لري؛ خو د افغانستان له خاورې بريدونو یې پاکستان اغېزمن کړی دی.
کاکړ ويلي، چې پاکستان د تروريزم قرباني دی او له تروريزم سره د مبارزې په لاره کې یې ډېرې قربانۍ ورکړي دي.
د افغانستان سرپرست حکومت بيا همېشه د افغانستان په خاوره کې د پاکستاني طالبانو د شتون ادعا رد کړې ده. افغان چارواکو د پاکستان له حکومت غوښتي، چې خپلې امنيتي ستونزې دې په کور دنننه حل کړې او پړه دې یې په افغانستان نه اچوي.
دوی زياته کړې، چې د افغانستان له خاورې هېڅ ګاونډي هېواد ته ګواښ نه دی پېښ.
هغه همدا راز په خپله دې مرکه کې ويلي، چې دا خبره سمه نه ده چې پاکستان دې د افغانستان له اوسنيو چارواکو سره پر کابل د حاکميت په برخه کې سياسي کومک کړی وي.
نوموړي په دې برخه کې پاکستان د امريکا او طالبانو تر منځ د یوه منځګړي په توګه ياد کړی دی او ويلي يې دي، چې پاکستان یواځې دواړو لورو ته د خبرو اترو زمينه برابره کړې ده.
