کابل (کوه نور، ۱۴ اسد ۱۴۰۴): د ملګرو ملتونو د بشري چارو د همغږۍ دفتر "اوچا" ویلي، افغانستان یو ځل بیا دا مهال د شدیدې وچکالۍ له څپې سره مخ هېواد دی.
دغه سازمان پرون ورځ "دوشنبه، د اسد ۱۳مه" پر اېکس پاڼه د یوه بیان په خپرولو سره ویلي، د بارانونو کمښت، د ځمکې ډېر وچوالي او لوړې تودوخې د افغانستان په یو شمېر سیمو کې پر للمي غنمو ډېر منفي تاثیر کړی او د څارویو لپاره د واښو کموالی یو جدي ګواښ دی.
د دغه دفتر په بیان کې ویل شوي، افغانستان کې د باران کچه ترمنځنۍ کچې ټیټه، د ګرمې اندازه له عادي حالته پورته او د خاوري رطوبت خورا ټیټ دی.
د اوچا دفتر په دې څرګندونو کې بادغیس، غور، فاریاب، سرپل، سمنګان، بغلان، تخار، بدخشان، دایکنډي، بامیان، پروان او کابل ولایتونه هغه ولایتونه یاد شوي چې د وچکالۍ له امله تر نورو ډېر زیانمن شوي؛ خو د هرات ولایت په اړه عادي حالت ته د ګرځېدو خبر ورکول شوی دی.
باید وویل شي چې ورته مهال د یو شمېر ولایتونو اوسېدونکو ویلي، د سږنۍ وچکالۍ له امله یې په پټیو کې فصلونه نه دي شوي.
