کابل (کوه نور ۲۶ سرطان ۱۴۰۴): د ملګرو ملتونو د بشري چارو د همغږۍ دفتر "اوچا" راپور ورکړی، چې د افغانستان پایتخت د یاد هېواد تر بل هر ښار ډېر د زلزلو له ګواښ سره مخ ښار دی.
اوچا پخپل تازه راپور کې، چې پرون ورځ "چهارشنبه، د سرطان ۲۵مه" خپور شوی ویلي، افغانستان د خپل جغرافیاوې موقیعیت له مخې د یوریشیا، هند او عربستان هېوادونو د ټکټونیکي صفحو د ټکر په سیمه کې موقیعیت لري، چې له همدې امله به په دوامداره توګه د زلزلو له خطر سره مخ شي.
راپور کې راغلي، کابل ښار کې د نفوسو ډېروالی، بې پلانه ښاري پراختیا او د غیر معیاري ودانیو شتون د زلزلو له امله د ډېر خطر د رامنځته کېدو وېره ډېره کړې ده.
د اوچاد راپور له مخې، د هېواد چمن، هریرود، مرکزي بدخشان او له بدخشان سره تړلې درواز سیمې له هغه زلزله ایزو سیمو څخه دي، چې له ۷-۸ ریښتره د زلزلې رامنځته کېدل پکې امکان لري.
د دغه دفتر په راپور کې راغلي، نه یواځې کابل بلکې؛ له کابل ورهاخوا د جلال اباد په ګډون بدخشان او هرات ښارونه او په ځانګړې توګه د هرات ښار چې په ۲۰۲۳ کال کې ورته د ریښتر په کچه ۶,۳ درجې زلزلې پراخ زیانونه اړولي وو.
دغه دفتر وړاندې لیکلي، تېرو لسو کلونو کې د زلزلو له امله افغانستان کې له شپږ سوه زرو ډېر افغانان زیانمن شوي او په منځني ډول هر کال د زلزلو له امله هېواد کې ۱۸۸ تنه مړه شوي دي.
اوچا پخپل دې راپور کې په ۲۰۲۲ کال کې د پکتیا او خوست هغو زلزلو ته اشاره کړې، چې له امله یې له ۱۰۰۰ ډېر افغانان مړه او ۱۵ سوه نور ټپیان شوي وو.
د نلکرو ملتونو د بشري همغږۍ دفتر دا خبرداری په داسې حال کې ورکوي، چې تازه د ملګرو ملتونو د کرنې او خوړو سازمان ویلي، د افغانستان ۱۹ ولایتونه له سختې وچکالۍ سره مخ شوي دي.
