ڪابل (ڪوه نور، ۱۰ جدي ۱۴۰۴): د ملګرو ملتونو د بشري چارو د همغږۍ دفتر "OCHA" ویلي، ۲۰۲۶ کال کې به لږ تر لږه ۲۱.۹ میلونه افغانان بشري مرستو ته اړتیا ولري، چې دا شمېر شاوخوا د هېواد نیمایي وګړي جوړوي.
د اوچا د راپور له مخې، دا شمېر په ۲۰۲۵ کال کې د اړتیا لرونکو په پرتله یو څه کم شوی؛ خو بیا هم بشري حالت شدید پاتې دی.
د OCHA وړاندوینه ښيي، چې بشري مرستې به د بېړنیو ژوند ژغورونکو خدماتو لپاره، لکه خوراک، پناه، روغتیا، پاکې اوبه، حفظ الصحې او نغدي مرستې باندې تمرکز وکړي؛ خو مرستې ته د تمویل اړتیا د ۱.۷۱ میلیارده ډالرو شاوخوا اټکل شوې ده.
اوچا دا هم ویلي، چې د تاوتریخوالي دوام، اقتصادي ستونزې، د خوراکي امنیت خرابوالی، اقلیمي بدلون، د مهاجرینو بیرته ستنېدل او همدارنګه طبیعي پېښو د خلکو د ژوند شرایط سخت کړي دي.
د سرچینې د مالوماتو پر اساس، دا حالت د افغانستان لپاره د نړۍ د تر ټولو لویو بشري کړکیچونو له ډلې دی او نړۍوالې مرستې دوام ته اړتیا لري؛ تر څو د نور بدتر حالت مخنیوی وشي.
