د بادغیس ولایتي مسؤولان وايي، د دغه ولایت په ابکمري ولسوالي کې د یوه فلانکوچ ډوله موټر د چپه کېدو له امله د ښځو او ماشومانو په ګډون ۶ تنه مړه او ۷ نور ټپیان شوي دي.
د ځايي اوسېدونکو په وینا، دغه موټر نن سهار «یکشبنه د اکتوبر ۲۹مه» له آبکمري ولسوالي څخه د هرات پر لور روان و چې له سړک بې لارې او یوې ژورې کندې ته ولویده.
ځايي اوسېدونکي زياتوي، د دې پېښې د ټپيانو روغتيايي حالت د اندېښنې وړ دى او د درملنې په موخه هرات ولايت ته لېږدول شوي دي.
د یادونې وړ ده چې په دغه ولايت کې وخت نا وخت د سړکونو خرابوالي او د موټر چلوونکو د بې احتياطۍ له امله ورته پېښې رامنځته او ګڼو کسانو ته پکې د مرګ ژوبلې اوښتو راپورونه ورکول کیږي.
