خبريال: فرمان الله زبيرزی
د ریاست الوزراء اقتصادي مرستیال عبدالغني برادر کندهار کې د یوې دینې مدرسې فراغت غونډه کې د وینا پر مهال ويلي، چې علماء باید له دیني حکمت څخه په استفادې خلک په نرمه ژبه سمې لارې ته راوبولي او هېچاته هم د پېغور او په تېزه ژبه خبرې ونه کړي.
نوموړي ویلي، چې اسلامي امارت د هېواد د هر اړخیز پرمختګ لپاره په سیاسي او اقتصادي مشارکت باور لري، دا مشارکت د تېرو څلورو کلونو پرمهال پياوړی شوی او د علماوو، علمي شخصیتونو او مسلکي کارکوونکو د مشورو او نظریو پر اساس ولاړ دی.
برادر زیاتوي، ټول هېوادونه دې په سیمه ییز او نړیوال فعال مشارکت کې د افغانستان اسلامي امارت له بالقوه ظرفیت او پياوړې ارادې څخه مناسبه ګټه واخلي.
د بردار پر وینا، یو امن افغانستان د ټولو لپاره له اقتصادي او سیاسي پلوه لوی فرصت ګڼل کېږي، هېڅوک باید فرصتونه په تهدیدونو بدل نه کړي.
اقتصادي مرستیال همدارز ویلي، ټولو هېوادوالو ته ډاډ ورکو، چې د اسلامي امارت له لوري به د هېچا حقوق او امانت ضایع نشي، ټول هېوادوال باید د هېواد په امنیت، ابادۍ او بیارغونه کې د خپل حکومت ترڅنګ ودریږي.
