ستره محکمه وایي، په بلخ ولایت کې یو هلک او نجلۍ ته په عام محضر کې تعزیري سزا ورکړل شوې.
د سترې محکمې له لوري په خپره شوې خبر پاڼه کې راغلي چې یادو ځوانانو نامشروع اړیکه لرله.
د سترې محکمې د یو بل خبر له مخې، د لغمان ولایت په قرغیو ولسوالۍ کې دوو کسانو ته د بد اخلاقۍ په تور تعزیري سزا ورکړل شوې.
خبر پاڼه کې راغلي، یاد دوه کسان په محضر کې ۳۰ - ۳۰ دورې وهل شوي دي.
د دغو دوو کسانو په اړه نور جزیات نه دي ورکړل شوي.
په ورته وخت کې د جوز جان سیمه ییزو مسوولینو خبر ورکړی چې ټاکل شوې سبا دوشنبه د شبرغان په لوبغالي کې د قصاص حکم پلی شي.
سرپرست حکومت تر دې وړاندې تېره پنجشنبه په غزني ولایت کې هم پر دوو کسانو د قصاص حکم پلی کړ.
هاخوا ملګرو ملتونو په افغانستان کې د اعدام سزا سره مخالفت ښودلی او د ځنډېدو غوښتنه یې کړې ده.
کابل د ملګرو ملتونو مرستندویه دفتر یا یوناما ویلي، دوی د اعدام د سزا سخت مخالف دي او دا چاره د ژوند له اساسي حقونو سره په ټکر کې ده.
