بهرنيو چارو وزارت سرپرست کابل کې د ملګرو ملتونو د سرمنشي ځانګړې استازې او د يوناما له مشرې روزا اتونباييفا سره د هېواد په اقتصادي، بشری او پرمختيايي وضعیت خبرې کړي دي.
د دغه وزارت ویاند مرستیال پر خپله اېکس پاڼه ليکلي، سرپرست وزير د نړيوال بانک هغه راپور ته په اشارې چې له مخې یې افغانستان په يوه کال کې ۲۷ سلنه اقتصادی پرمختګ کړی ويلي، د افغانستان اقتصاد له ثبات ورسته مخ پر وده روان دی.
خبر پاڼه کې راغلي، حکومت د هېواد د اقتصادي پياوړتيا لپاره نور پلانونه هم لري په بشپړېدو سره به يې پرمختګونه راشي.
په همدې حال کې د يوناما مشرې ويلي، افغانستان سره يې پرمختيايي برخو کې مرستې له بشري مرستو ډېرې شوي دي.
نوموړې دغه چاره مثبت بدلون ياد کړی او ډاډ يې ورکړی چې لا به ادامه کوي.
سرچینې دغه راز ويلي، اغلې روزا د سرپرست حکومت اقتصادي هڅې ستايلي او ويلي يې دي چې د ملګرو ملتونو په ناستو کې به يې شریکې کړي.
