د بهرنيو چارو وزير م.ا.م نن له خپل ايراني سيال سيد عباس عراقچي سره ټيليفوني خبرې کړې دي.
بهرنيو چارو وزارت ليکلي، دغه خبرو کې پر دوه اړخيزو اړيکو او د افغانستان او پاکستان ترمنځ د وروستیو ستونزو پر حل ټينګار شوی دی.
د دغه وزارت د معلوماتو له مخې، عراقچي ويلي، هېواد یې چمتو دی چې د دواړو هېوادونو ترمنځ د خبرو په برخه کې رغنده رول ولوبوي.
همدې حال کې بيا د بهرنيو چارو وزير ويلي، پاکستان ته ښه نيت لري او غواړي خپلې ستونزې ورسره د خبرو له لارې حل کړي.
نوموړي زياته کړې، د مشرتابه په هدايت يې باصلاحيته پلاوی د خبرو لپاره استولی وو، چې همدا له پاکستان سره د ښه نيت ښکارندوی کوي، خو پاکستان په مذاکراتو کې هیڅ ډول مسووليت منلو ته چمتو نه وو.
عراقچي د بهرنيو چارو له وزير سره داسې مهال اړيکه نيسي چې نوموړي نن له خپل پاکستاني سیال سره هم تيليفوني خبرو کې د دواړو هېوادونو ترمنځ د کشالې په حل ټينګار کړی وو.
دا په داسې حال کې ده چې د افغانستان او پاکستان ترمنځ درې پړاوه مذاکرات پرته له کومې پايلې پای ته ورسېدل، خو اوربند به د دواړو هېوادونو ترمنځ دوام کوي.
