تخار کې یو کس د حرامې غوښې د پلورلو په تور نیول شوی.
د تخار د عامې روغتیا ریاست مسؤولان په دغه ولایت کې د مړو شوو چرګانو د غوښې د پلور په تور د یو کس د نیولو خبر ورکوي.
د تخار د عامې روغتیا ریاست د چاپیریالي روغتیا برخې عمومي مسؤل ډاکټر سلطان محمد احمدي نن دوشنبه «د اکتوبر ۲۳مه» ویلي چې په تالقان ښار کې یې د چرګانو د خرڅلاو د څارنې پرمهال یو تن هټیوال له ۵۰۰ مردارو شوو چرګانو سره نیولی دی او دوکان یې ورته مهرلاک کړی دی.
د ښاغلي احمدي په وینا، یاد کس په یو شمېر چرګان پلورونکو او هوټلدارانو ناروغ او مړه چرګان پلورل چې د عامې روغتیا ریاست د چاپېریال ساتنې د څارنې د ټیم له خوا له پېژندلو وروسته ونیول شو.
د مسؤولانو په خبره، د یاد کس قضیه یې عدلي او قضایي ارګانونو ته د څیړلو په موخه لیږلې ده.
