په کابل کې د ترکیې سفیر وايي، هېواد به یې هیچاته اجازه ورنه کړي چې د دوی په خاوره کې د اسلامي امارت خلاف سیاسي او پوځي حرکتونه وکړي.
نوموړي د ریاست الوزرا له سیاسي مرستیال سره په کتنه کې ویلي، چې هېواد له افغانستان څخه ملاتړ ته چمتو دی.
په همدې حال کې سیاسي مرستیال مولوي عبدالکبیر د ترکیې له دغه دریځ ملاتړ کړی او ویلي یې دي، چې اوس مهال په هېواد کې ټولو ته د ارام ژوند زمینه برابره شوې.
له ارګ څخه په خپره شوې خبرپانه کې راغلي ، جنک اونا ویلي، ترکي سوداګر چمتو دي چې په افغانستان کې د کانونو، برېښنا او کرنې په برخو کې پانګونه وکړي او دغه راز ترکیه د پوهنې او لوړو زده کړو په برخه کې له افغانستان سره همکاري ته چمتو ده.
سیاسي مرستیال نوموړي ته ډاډ ورکړی، چې اسلامي امارت د ټولو پانګوالو لپاره اسانتیاوې رامنځته کړې دي.
د ترکیې سفیر دا څرګندونې په داسې حال کې کوي، چې اوس مهال په دغه هېواد کې د پخواني حکومت یو شمېر لوړ پوړي چارواکي او سیاسون وخت ناوخت ناستې کوي.
