وروسته له هغې چې د پاکستان حکومت «بې اسنادو» افغان کډوالو ته له دغه هيواده د وتلو امر وکړ، په تيرو اتو ورځو کې شاوخوا ۷۱ زره کورنۍ یوازې د تورخم بندر له لارې افغانستان ته راستنې شوي دي.
په تورخم کې د افغان پریس خبريال وايي وضعيت له لومړيو ورځو عادی شوی، د سرپناه، خوړو، اوبو او ورته ستونزې څه نا څه حل شوي او ځينې بهرنۍ او داخلي خيريه مؤسسې يې هم لاسنيوي ته ورغلي دي.
خو بلخوا بیا له پاکستانه راستانه شوي کډوال په تورخم کې د نومليکنې له ټکني بهيره سر ټکوي، وايي هغه مرستې چې له نوم لیکنې وروسته ورسره کیږي، اړ دي په ورځو - ورځو انتظار ورته تېر کړي.
ځايي سرچينو افغان پریس ته دا هم ويلي چې په تيرو درېيو ورځو کې د ګډوالو د راتګ بهير ورو شوی او خورا کموالی په کې راغلی دی.
په ورته مهال د پاکستان حکومت د اکتوبر په لومړيو کې پريکړه کړې وه چې په څو پړاوونو کې به شاوخوا ۱ اعشاريه ۷ ميليونه کډوال له پاکستانه وباسي، چې اوس یې لومړی پړاو پای ته رسېدلی ښکاري.
