کابل (کوه نور، ۷ عقرب ۱۴۰۴): تېره یوه میاشت کې د ټولګټو وزارت د اوسپنې پټلۍ له لارې ۴۹۳ زره او ۵۰۷ متریک ټنه توکي انتقال شوي دي.
د ټولګټو وزارت ویاند محمد اشرف حق شناس ویلي، له دې جملې د حیرتان بندر له لارې ۳۵۱ زره او ۶۸۱ ټنه، د آقینې بندر له لارې ۲۷ زره او ۲۵۷ ټنه، د تورغنډۍ بندر له لارې ۶۸ زره او ۱۶۵ ټنه او د خواف–هرات له لارې ۴۶ زره او ۴۰۳ ټنه توکي انتقال شوي دي.
حق شناس پر خپله اېکس پاڼه لیکلي، دا ټول توکي، چې تیل، غیر تیلي مواد او نور تجارتي توکي پکې شامل دي، افغانستان ته وارد او له هېواده صادر شوي دي.
نوموړي زیاته کړې، دې انتقالاتو کې یوه برخه صادرات او ترانزیت دي، چې تېره میاشت ۹۷۱ متریک ټنه تجارتي توکي صادر شوي، چې ډېری یې وچه مېوه او د انارو جوس وو.
د هغه پر وینا، هرڅومره چې د اورګاډي له لارې صادرات او واردات زیاتېږي، نو همدومره کاري فرصتونه رامنځته کېږي، ملي عواید لوړېږي او هېواد د اقتصادي ثبات، پراختیا او ځان بسیاینې پر لور روانېږي.
د ټولګټو وزارت ویاند وړاندې لیکلي، یاد وزارت هڅه کوي، چې د تجارانو لپاره د انتقالاتو مناسب شرایط برابر کړي او د ملي عوایدو د زیاتوالي په موخه د اورګاډي له لارې د تجارتي توکو د انتقال لړۍ چټکه او دوامداره وساتي.
