د احصایې او معلوماتو ملي ادارې مسوولانو نن په یوه خبري کنفرانس کې وویل، د سرپرست حکومت په واکمنیدو سره یې، ۷.۸ میلیونه الکترونیکي پېژندپاڼې وېشلې دي.
د یادې ادارې سرپرست ډاکتر فقیرمحمد زیار وایي، د الکترونکي تذکرو د وېش له پیل څخه تر دې مهاله په ټولیز ډول د وېشل شویو پېژندپاڼو کچه ۱۳ میلیونه او ۸۶۸ زرو ته رسېدلې ده.
د دغې ادارې د معلوماتو له مخې، تېر کال کې درې میلیونه او ۲۶۵ زره او ۶۰۰ الکترونیکي پېژندپاڼې وېشل شوې چې د مخکیني کال په پرتله ۲۳ سلنه زیاتوالی ښیي.
زیار وویل، د لا ښو خدمتونو وړاندې کولو په موخه یې مرکز او ولایتونو کې د اسان خدمت پنځه دفترونه فعال کړي چې څه باندې ۲۰۰ زره کسانو ته یې د برېښنایي پېژندپاڼو، زېږون کارتونو د وېش او نورو برخو کې اړین خدمتونه وړاندې کوي.
دغه راز د یادې ادارې د معلوماتو پر اساس، تېر کال د هېواد په کچه د وګړو سرشمېرنه شوې چې په ترڅ کې یې د افغانستان د وګړو شمېر ۳۵.۸ میلیونه اټکل شوی چې ۱۸.۲ میلیونه یې نارینه او ۱۷.۵ میلیونه یې ښځې دي.
