د روغتيا نړۍوال سازمان وايي، افغانستان کې يې په دوه میاشتو کې د شري ناروغۍ شاوخوا اوه زره پېښې ثبت کړي دي.
د دغه سازمان د راپور له مخې، په خوست، بلخ، فراه او سمنګان ولايتونو کې د شري ناروغۍ له امله ۲۹ کسان مړه شوي او نورې ۱۷۹ مشکوکې پېښې ثبت شوي دي.
په ثبت شويو ۷ زره پېښو کې یې ۵ زره هغه ماشومان دي چې عمرونه یې له پنځه کالونو ښکته دي.
د يادې ناروغۍ د زياتوالي لامل د هوا سړېدل او د محافظتي سهولتونو نشتوالی په ګوته شوی دی.
د روغتیا نړیوال سازمان تېر ۲۰۲۳ کال کې شاوخوا ۲۵ زره د شري مشکوکو پېښو د ثبت او په دغې ناروغۍ د ۶۴ کسانو مړینه ثبت کړې وه.
