د احصايې او معلوماتو ملي اداره وایي، تېر کال یې د هوايي ډګرونو او ځمکنيو بندرونو له لارې هېواد ته د ۲۷ زره او ۹۱۴ بهرنيو وګړو تګ - راتګ ثبت کړی دی.
د احصایې او معلوماتو ادارې ویاند محمد حلیم رافع وایي، تېر کال کې د ۶۷۵ ښځینهوو په ګډون، ۱۵ زره او ۱۵۳ تنه بهرني وګړي هېواد ته راغلي او ۱۲ زره او ۷۶۱ نور له دې ډلې ۴۹۵ یې ښځې دي، له هېواده وتلي دي.
دیادې ادارې د معلوماتو له مخي، د بهرنیو وګړو تر ټولو ډېر تګ ـ راتګ د نیمروز ولایت له بندر، د هرات ولایت له هوايي میدان او بندرونو، د تورخم او حیرتانو بندرونو او د کابل هوايي ډګر له لارې ثبت شوی دی.
رافع وایی، ثبت شوي ارقام ښيي چې ډېری بهرني وګړي د سیاحت او کار په موخه افغانستان ته راغلي دي.
د ثبت شویو معلوماتو پر بنسټ بهرنيو سیلانیانو ډېری د (بامیان، هرات، کندهار، ننګرهار، غور، بدخشان، کندوز، پکتیا، خوست، نورستان، بلخ، سمنګان او کوڼر) ولایتونو له لرغونو ځایونو لیدنه کړې ده.
خبرياله: خاطره اکبري
