د احصايې او مالوماتو ملي ادارې پر خپله اېکسپاڼه ليکلي، تېر (۱۴۰۲) لمريز کال کې يې په ټول هېواد کې ۳ ميليونه او ۱۲۴ زره برېښنايي تذکرې وېشلي دي.
د سرچينې د مالوماتو له مخې، د ویشل شویو تذکرو له جملې دوه ميليونه او نږدې ۱۶۸ زره یې نارينهوو او يو ميليون او څه باندې ۵۶ زره یې ښځينهوو ته ورکړل شوې دي.
د دغې ادارې په خبره، له ټولو ډېرې تذکرې يې په پلازمینه کې وېشل شوي دي چې شمېر يې نږدې ۷۰۰ زرو ته رسيږي او همداراز يې بيا په هرات کې نږدې ۲۸۰ زره، بلخ کې څه باندې ۱۸۸ زره او په ننګرهار کې بيا تر ۱۶۲ زره برېښنايي تذکرې وېشلې دي.
د يادې ادارې د مالوماتو له مخې، د برېښنايي تذکرو د بهير له پيله شاوخوا ۱۲ ميليونه او ۹۰۰ کسانو برېښنایي تذکرې ترلاسه کړې دي چې له جملې يې ۷.۵ ميليونه نارينه او ۵.۴ ميليونه ښځينه دي.
د يادونې وړ ده چې د سرپرست حکومت له حاکميت را وروسته ۶ ميليونه او ۸۱۲ زره برېښنايي تذکرې وېشل شوې دي.
