سرپرست حکومت د یوې میاشتې په موده کې کابل ته د وچو زیرمه شویو لرګیو د لېږد اجازه ورکړه
د سرپرست حکومت ویاند وايي، دغه پرېکړه د پلازمېنې کابل د اوسیدونکو د ستونزو د حل او سون توکو ته د لاسرسي په موخه شوې چې له مخې به یې د وچو لرګیو سوداګر د یوې میاشتې په موده کې د پکتیکا، خوست او پکتیا ولایت لرګي د کابل بازارونو ته لیږدول کيږي.
نوموړی دغه راز ټينګار کوي چې د هېواد د ځنګلونو د هر ډول ونو وهل او قاچاق منع دی.
د سرپرست حکومت د ویاند د معلوماتو له مخې، سرپرست حکومت د کونړ، نورستان، پکتیا، خوست پکتیکا او ځینو نورو ولایتونو د ځنګلونو د ساتلو لپاره د زرغونې قطعې په نوم شاوخوا ۱۶ زره کسیزه قطعه ګومارلې، څو د ځنګلونو د وهل کېدو او قاچاق کېدو مخه ونیسي.
حکومت په داسې حال کې د ځنګلونو د ساتنې په موخه د یوې پوځي قطعې د جوړولو خبره کوي چې تازه په ټولنیزو رسنیو کې د کونړ او نورستان ولایت د نښترو د وهلو او قاچاق په تړاو د خلکو اندېښنې ډيرې شوي او غوښتنه کوي چې مخه یې باید ونیول شي.
