د خوست د شمل خرم سينديزې حوزې مسولينو ويلي، د اوبو او برېښنا وزارت په همکارۍ يې د دغه ولايت په بېلابېلو سیمو کې پر ځينو وړو بندونو کار پيل کړی، ترڅو د سيمې اوسيدونکو ته کافي اوبه ورسيږي او همداراز د ځمکې لاندې اوبو سطحه پورته راشي.
تازه په نادر شاه کوټ ولسوالۍ کې د يو بند د جوړولو چارې پيل شوي چې د لس زره متره مکعب اوبو ذخیره کولو وړتيا به ولري.
د يادونې ده چې په کندز کې د ۹ چيک ډیمونو او همداراز په بامیانو کې بيا د درې چيک ډیمونو جوړولو چارې پیل شوې.
د مسولینو په خبره د هېواد په هره ولسوالۍ کې به يو چيک ډيم جوړوو.
وايي، له دې کار یې موخه د اوبو سالم مدیریت او د ځمکې لاندې اوبو سطحه پورته راوستل دي.
سرپرست حکومت وایي، د اوبو مدیریت يې له لومړيتوبونو څخه دی او په وينا يې جدي پاملرنه به ورته کوي.
په دې وروستیو کې د پلازمېنې کابل په ګډون د ګڼو ولايتونو اوسېدونکي د وچکالۍ له امله له سخت کړاو سره مخ دي، چې لامل يې د ځمکې لاندې اوبو سطحه مخ په ښکته تلل ښودل شوی.
