احصايې او معلوماتو ملي ادارې پر خپله اېکسپاڼه ليکلي، د پکتيا ولايت د احصايې او معلوماتو ملي اداري تېر ۱۴۰۲ لمريز کال په دغه ولايت کې ۷۲ زره او ۹۶۱ کسانو ته تذکرې وېشلي دي چې له ياد شمېر يې ۴۵ زره او ۴۲۸ الکترونيکي او ۲۷ زره او ۵۳۳ يې بيا کاغذي دي.
د دغه ولايت د احصايې او معلوماتو اداري رييس وايي، هره ورځ نږدې اته سوه کسان د تذکرو او اړونده خدماتو د ترلاسه کولو په موخه دغه رياست او اړونده دفترونو ته مراجعه کوي.
سرچينه وايي، د مرکز ګردېز په ګډون په ټولو ولسواليو کې د دغه ادارې مرکزونه فعال دي.
د سرچيني په خبره توانيدلي چې په دغه ولايت کې ۴۰۰۰ کسانو ته د مړينو او زېږېدنې د ثبت خدمات هم وړاندې کړي.
دغې ادارې ويلي، د تذکرو د وېش لړۍ يې لرو پرتو سيمو ته غځولې او خلکو ته د اسانتيا برابرولو په موخه يې مرکزونه جوړ کړي دي.
