کابل (کوه نور، ۲۵ عقرب ۱۴۰۴): احصایې او معلوماتو ملي ادارې اعلان کړی، چې د تېر میزان په میاشت کې د افغانستان صادرات نږدې ۲۷۵ میلیون امریکایي ډالرو ته رسېدلي، چې د سنبلې میاشتې په پرتله ۴۵.۱ میلیون ډالر زیاتوالی ښيي.
د دې ادارې په خبرپاڼه کې راغلي، چې د ۱۴۰۴ هـ.ش کال د میزان میاشتې د هېواد د صادراتو او وارداتو شمېرې راټولې او تحلیل شوې دي.
د سرچینې پر وینا، د میزان میاشتې په جریان کې د هېواد د ټولو صادراتو ارزښت ۲۷۴.۹ میلیون ډالر او د وارداتو ارزښت یو میلیارد او ۱۶۸.۴ میلیون امریکایي ډالر و.
همداراز، د ادارې د معلوماتو له مخې، د ۱۴۰۴ کال د سنبلې میاشتې ټول صادرات ۲۲۹.۸ میلیون ډالرو ته رسېدل، چې د تحلیلونو له مخې، د میزان میاشتې صادرات د سنبلې میاشتې په پرتله ۴۵.۱ میلیون ډالر زیات شوي دي.
سرچینې وړاندې لیکلي، چې بلخوا د هېواد واردات د سنبلې په میاشت کې یو میلیارد او ۲۳۲.۶ میلیون ډالر وو، خو دا کچه د میزان په میاشت کې ۶۴.۲ میلیون ډالرو ته راټیټه شوې.
د احصایې او مالوماتو ملي ادارې همداراز ویلي، چې د میزان میاشتې په جریان کې ډېری صادرات هند، پاکستان، ترکیې او متحده عربي اماراتو ته شوي او واردات بیا تر ډېره له ایران، چین، پاکستان او متحده عربي اماراتو څخه ترسره شوي دي.
نړۍوالو معلوماتو ته په کتو، دې ادارې ویلي، چې صادرات د اصلي صادراتو او بیا صادراتو (re-export) څخه او واردات د محصول شوو او غیر محصول شوو توکو وارداتو څخه جوړ شوي؛ خو د وارداتي برېښنا ارزښت پکې نهدی شامل.
