د ریاست الوزراء اقتصادي معاونیت پر خپله اېکسپاڼه لیکلي، د یاد ریاست اقتصادي مرستیال د ازبکستان لومړي وزیر عبدالله عارفاوف سره د افغانستان د نړیوال نندارتون په مرکز کې د ۲.۵ میلیارد ډالرو په ارزښت ۳۵ هوکړهلیکونه لاسلیک کړي دي.
سرچینه وایي، دغو هوکړهلیکونو کې د ۱.۴ میلیارد ډالرو په ارزښت ۱۲ د پانګونې او د ۱.۱ میلیارد ډالرو په ارزښت ۲۳ سوداګریز هوکړهلیکونه شامل دي چې په پلي کېدو سره به یې د دواړو هېوادونو ترمنځ اقتصادي اړیکې پیاوړې او د سوداګرۍ په کچه کې به د پام وړ زیاتوالی راشي.
د یادونې وړ ده چې کابل کې د ازبکستان هېواد د تولیداتو او محصولاتو نندارتون چې دوه ورځې وړاندې پرانستل شوی، نن یې وروستی ورځ ده.
دغه نندارتون کې د یاد هېواد بېلابېل تولید شوي توکي نندارې ته اېښودل شوي دي.
