د افغانستان بانک پر خپله اېکسپاڼه ليکلي، سبا «سه شنبه» د داوطلبۍ له لارې اتلس ميليونه ډالر د ليلام په ډول پلوري.
دغه بانک له سوداګريزو بانکونو، د پولي خدماتو له شرکتونو او نورو په شرايطو برابرو کسانو غوښتي چې په دغه داوطلبي کې ګډون وکړي.
سرچينې همداراز له ټولو ګډون کوونکو غوښتي چې په داوطلبي کې له ګډون کولو د مخه خپلې حسابيانې پاکې کړي.
ياد بانک همداراز ويلي، په داوطلبي کې قسمي تسويې ته اجازه نه ورکوي او داوطلب کسان اړ دي چې د خپل ذمت د قيمت پیسې په يو ځل او په نغدي ډول د افغانستان بانک ته وسپاري.
د افغانستان بانک د افغانيو د ارزښت ساتلو په موخه نږدې هره اوونۍ ميليونه ډالر ليلاموي.
ياد بانک وايي، د تېر په پرتله یې د افغانيو ثبات ساتلی او په خبره يې د بهرنيو اسعارو پر وړاندې د افغانيو ارزښت ډېر ښه شوی دی.
