د افغانستان د خبریالانو ملاتړ سازمان د چهارشنبې په ورځ یوه خبرپاڼه کې ویلي، ایران او پاکستان کې افغان خبریالان له بې وزلۍ او بېلابېلو ګواښونو سره مخ دي.
خبرپاڼه کې راغلي چې غربي هېوادونو ته د خبریالانو د لېږد بهیر درول شوی او دوی له اقتصادي ستونزو او د وېزو له ستونزې سره مخ دي.
دغه سازمان پر هېوادونو، د رسنیو پر ملاتړو بنسټونو، د بشري حقونو او د کډوالۍ پر بنسټونو غږ کړی چې ایران او پاکستان کې د افغان خبریالانو د مرستې لپاره اقدام وکړي.
دا په داسې حال کې ده چې د ديارلسو افغان خبريالانو د کډوالۍ ويزې د فرانسې لهخوا رد شوې دي.
