ټاکل شوي چې د ملګرو ملتونو امنيت شورا نن سه شنبه (د سپتمبر ۲۶مه) د افغانستان په اړه ځانګړې غونډه جوړه کړي.
د ملګرو ملتونو مطبوعاتي دفتر په یوې خبرپاڼه کې د دې ناستې د جوړېدو خبر ورکړی دی.
په خبرپاڼه کې راغلي، چې په نننۍ ناسته کې به د ازاد بحث تر څنګ د تړلو دروزاو تر شاه هم د افغانستان په اړه خبرې او بحثونه وشي.
د نننۍ غونډې د بحث موضوع تر ډېره د افغان نجونو او ښځو د حقونو په ځانګړې توګه د کار او زدهکړو د حقونو په اړه خبرې اترې دي.
د امنيت شورا تر نننۍ ناستې وروسته به د امريکا، فرانسې، جاپان، متحده عرب اماراتو، البانيا، برېتانيې او سوېس په لاسليک يوه ګډه اعلاميه هم خپره شي.
د ملګرو ملتونو مطبوعاتي دفتر خبرپاڼه وايي، چې دې غونډې ته به د ملګرو ملتونو عمومي منشي انتونيو ګوترېش خپل درې مياشتنی راپور او په افغانستان کې د ملګرو ملتونو عمومي منشې استازې، روزا اتونبايوا به د افغانستان د وروستيو حالاتو په اړه معلومات وړاندې کړي.
په افغانستان کې د ملګرو ملتونو د عمومي منشي استازې، له افغانستانه تر سفر وړاندې کابل کې د بهرنيو چارو وزارت سرپرست امير خان متقي سره په کتنه کې د دې ناستې د جزياتو په اړه خبرې اترې کړې وي.
د افغانستان لپاره د ملګرو ملتونو مرستندویه ماموريت هغه مهال په خپله اعلامیه کې ليکلي وو چې: «یوناما له افغانستان سره رغنده تعامل او د افغانانو غږ اورېدلو ته ژمن دی.»
د ملګرو ملتونو امنيت شورا تر دې مخکې هم څو ځله د افغانستان په اړه ځانګړې غونډې جوړې کړې او تر ډېره يې تاکيد په افغانستان کې د ټولګډونه حکومت د جوړېدو او د افغان نجونو د حقونو پر تامين وو.
