د اوسپنې پټلۍ اداره وايي، د افغان ټرانس پروژې علمي سروې پای ته رسېدلې او سرپرست حکومت يې له افغانستان څخه د تېرېدو مسير ټاکلی دی.
ياده پروژه چې د ازبکستان له ترمز تر بلخ او له بلخ تر پېښوره جوړيږي منځنۍ آسیا د افغانستان له لارې د پاکستان له کراچۍ، ګوادر او قسیم بندرونو سره نښلوي.
د ازبکستان ولسمشر شوکت ميرضايف د قطر له امير سره په ليدنه کې په افغان ټرانس پروژه کې د پانګونې غوښتنه کړې وه، چې نوموړي په دغه پروژه کې د پانګونې ډاډ ورکړی و.
بلخوا د اوسپنې پټلۍ ادارې ويلي، د قطر سربېره روسیه او متحده عربي امارات هم لېواله دي چې پر دغه پروژه پانګونه وکړي.
