د ايران مرستيال سفير په مشري ۷ کسيز پلاوي د پوهنې وزارت سرپرست حبيب الله اغا سره کتلي.
دوی په دغه ليدنه کې په ايران کې د مېشت افغان کډوالو ماشومانو د زدکړو، ښوونيز حالت او نورو ګڼو مسایلو خبرې کړي.
په دغه ليدنه کې د ريښتيني ګاونډيتوب په پاللو او دوه اړخيزو مشترکو ګډو هم ټينګار شوی.
د پوهنې سرپرست وزير په ايران کې د افغان کډوالو ماشومانو د ښوونيز حالت په ښه والي، د هغوی لپاره د متوازنو ښوونيزو اسانتياوو برابرولو ټينګار وکړ.
د ايران مرستيال سفير وويل، اوسمهال په ايران کې له ۴۰ زرو ډېر افغان کډوال په زدکړو بوخت دي، چې ټولو ته يې اړينې ښوونيزې اسانتياوې برابرې کړي.
ايراني لوري ډاډ څرګند کړ، چې په دغه هېواد کې مېشت ماشومانو ته به د افغانستان د پوهنې وزارت له غوښتنو سره سم اسانتياوې برابرې شي او د دواړو هېوادونو ترمنځ به د دوه اړخيزو همکاريو نوی فصل پرانستل شي.
