د بخښنې نړۍوال سازمان وايي، چې پاکستان کې د افغان کډوالو وضعيت د اندېښنې وړ دی.
دغه سازمان پر اېکس ټولنیزه پاڼه ليکلي، چې پاکستان ته کډه شوي ډېری افغانان اوسمهال د خپلسري نيول کېدو او شړل کېدو له ګواښ سره مخ دي.
د بښنې نړيوال سازمان ويلي: «دا ډېره اندېښمنوونکې ده چې پاکستان کې د افغان کډوالو وضعيت ته په نړۍواله کچه پاملرنه نه کېږي.»
د پاکستاني رسنيو د راپورونو له مخې، د دې هېواد پوليسو يواځې د جمعې په ورځ اسلام اباد کې شاوخوا ۸۰۰ افغان کډوال نيولي وو، چې ۴۰۰ شاوخوا یې د اسنادو تر کتلو وروسته خوشې کړي او نور لا هم بنديان دي.
د پاکستان حکومت څو وځې وړاندې له دې هېواده د شاوخوا يو میليون افغان کډوالو د ويستلو اعلان وکړ. د دغه هېواد د کورنيو چارو وزارت وايي، د غير قانوني افغان کډوالو د ويستلو طرحه یې د تاييد لپاره پارلمان ته وړاندې کړې ده.
د دغې طرحې له مخې، پاکستان غواړي، ټول هغه افغان کډوال چې دې هېواد کې یې د قانوني اسنادو وخت پای ته رسېدلی وباسي.
د کډوالو په چارو کې د ملګرو ملتونو کمېشنرۍ د معلوماتو له مخې اوسمها په دې هېواد کې شاوخوا درې نيم ميليونه افغان کډوال مېشت دي، چې ۱.۳ ميليونه یې قانوني اسناد له ځان سره لري.
