د حکومت د رسنيو دفتر په خپله اکس پاڼه ليکلي، د بهرنيو چارو سرپرست وزير کابل کې د ګڼ شمېر هېوادونو له سفيرانو او ډيپلوماټانو سره ليدلي.
په دغه ليدنه کې د روسيې، چين، ايران، پاکستان، ازبکستان، قزاقستان، ترکمنستان، هند، ترکيې او اندونیزیا سفيرانو او ډيپلوماټانو ګډون درلوده.
سرپرست وزير د سيمې له هېوادونو سره د افغانستان اړیکې د اړينې وګڼلې او ټينګار يې وکړ چې د سیمې هېوادونه بايد له افغانستان سره د مثبت تعامل لپاره سيميزې سلا مشورې ترسره کړي.
نوموړي همداراز له دوی وغوښتل په افغانستان کې دې له رامنځته شويو فرصتونو ګټه پورته کړي او د بالقوه ګواښونو د مدیریت په تړاو دې همغږي ولري.
هغه همداراز ويلي، د يوناما او په افغانستان کې د يوه خپلواک او مرکزي حکومت په شتون کې د ځانګړو استازو ټاکلو ته اړتيا نشته.
متقي د سيمې له هېوادونو سره داسې مهال ناسته کوي چې څو ورځې وړاندې د رییس الوزرا سياسي مرستيال ويلي وو؛ که څه هم په رسميت ندي پېژندل شوي خو بیا هم په اوولس هېوادونو کې سیاسي نمايندګيانې لري.
