خبریاله: نازو عمري
د بېپولې ډاکټرانو نړیوال سازمان (MSF) خبرداری ورکړی چې له پاکستانه تازه را اېستل شوي افغان کډوال له جدي بشري ستونزو سره مخ دي او که یې لومړنې اړتیاوې پوره نه شي؛ نو ژمی به ورته د یو خاموش قاتل په څېر وژونکی تمام شي.
یاد سازمان په خپل تازه راپور کې ویلي، دا کډوال روغتیايي خدمتونو، بېړنۍ سرپناه، مناسبه تغذیه او نورو بنسټیزو خدمتونو ته لاسرسی نه لري او دغه وضعیت یې ژوند له خطر سره مخ کړی دی.
نړیوالو سازمانونو په وار وار خبرداری ورکړی، که عاجل اقدامات و نه شي، د راستنو شویو کډوالو وضعیت به لا ډېر بحراني شي.
د یادونې ده، چې تر دې وړاندې اقتصاد وزارت هم ویلي وو، چې د نړیوالو مرستو له کمرنګه کېدو سره اړمنو ته مرستو رسوولو بهیر هم ټکنی شوی دی.
