د سمنګان ولايت سيميز مسوولين وايي، د دغه ولايت په «روی دواب» ولسوالۍ کې له ۲۷۸۷ کورنيو سره د خوراکي توکو مرسته شوې.
د مسولینو په خبره دغه مرستې د (ASIO) مؤسسې لخوا په اړمنو کورنيو وېشل شوي.
په دغه توکو کې ۲۸۷ ټنه اوړه، ۲۷ زره ليټره غوړي او نور غذايي توکي شامل وو.
تر دې وړاندې د خوړو نړيوال سازمان ويلي وو، په افغانستان کې له اړمنو سره د مرستې لپاره د بوديجې له کمښت سره مخ دي.
د يادونې وړ ده، چې څو ورځې وړاندې د کډوالو چارو سرپرست وزير په بلخ کې د نړيوالو بنسټونو له مسوولينو سره په ناسته کې ويلي وو، له افغانانو سره مرستې د کار په بدل کې وکړئ.
نوموړي ويلي وو، ګدايي د افغانانو غرور کې نشته او مرستې باید د کار په بدل کې ووېشل شي.
ده همداراز له نړيوالو بنسټونو غوښتي وو، چې د ژمي په رارسېدو سره دې له کډوالو سره ژمنۍ مرستې وشي.
