کابل (کوه نور، ۱۲ اسد ۱۴۰۴): د خوړو نړۍوال پروګرام "WFP" پر اېکس پاڼه له ګاونډیو هېوادونو د راستنو شوو افغان کډوالو پر وضعیت اندېښنه څرګنده کړې او ویلي یې دي چې اوس دې برخې ته د بېړنۍ مرستې رسونې لپاره ۵۳۹ میلیونه ډالرو ته اړتیا لیدل کېږي.
دې ادارې همدارنګه لیکلي، په راستنو شوو افغان کډوالو کې دا مهال تر ټولو ډېر زیانمن شوي وګړي ښځې او ماشومان دي او د دوی د لوږې ګراف له ورځې بلې ته مخ پورته ځي.
یادې ادارې ټینګار کړی چې په راتلونکو شپږو میاشتو کې د راستنو شوو کډوالو د بېړنۍ مرستې لپاره ورته ۵۳۹ میلیونه ډالر پکار دي.
د خوړو نړۍوال پروګرام دا څرګندونې په داسې حال کې کړي دي چې له تېرو نږدې دوو میاشتو راپه دېخوا له ایرانه لږ تر لږه یو نیم میلیون افغان کډوال را ستانه شوي دي.
بل پلو سرپرست حکومت ټینګار کړی چې که څه هم له ایرانه د افغان کډوالو راستنېدنه کې د پام وړ ډېروالی راغلی؛ خو ویلي یې دي چې، تر دې مهاله یې هرڅه په بشپړ ډول مدیریت کړي دي.
