د اطلاعاتو او کلتور وزارت وياند حسيب غفران پر خپله اېکس پاڼه ليکلي، د رسنيزو سرغړونو کمیسیون د هېواد سیاسیون او کارپوهان له افغانستان انټرنشنل راډيو ټلويزيون سره له بحثونو منع کړي دي.
د سرچينې په خبره ياده رسنۍ د ژورنالېزم اخلاق په پام کې نه نيسي او د مقدساتو او ملي ارزښتونو خلاف خپرونې کوي.
سرچينې همداراز ويلي، دغه رسنۍ شخصیت وژنې کوي او ډېر کله د خبرونو دقت د سرعت قرباني کوي.
نوموړي لیکلي، یاده رسنۍ تعصب ته لمن وهي او همداراز د مېلمنو په غورواي کې هم مسلکي چاره نه مراعاتوي.
ده همداراز له ټولو هېوادوالو غوښتي چې د ملي او ايماني مسووليت له مخې دې نور د دغې رسنۍ خپرونې نه ګوري.
افغانستان انټرنشنل راډيو ټلويزيون چې له هېواد بهر فعاليت کوي تراوسه يې د سرپرست حکومت د دغې پرېکړې په اړه څه نهدي ويلي.
د يادونې ده چې حکومت تر دې وړاندې په هېواد کې د امریکا غږ اشنا او آزادي راډيو خپرونې هم بندې کړې دي.
