د پرلپسې دوو ورځو ورښتونو او واورو له امله د سالنګونو په ګډون په ۵ ولايتونو کې د ترافيکو پر مخ لارې تړل شوي دي.
د ټولګټو وزارت د خپرې شوې خبرپاڼې له مخې، د سالنګونو لویه لار د درنو ورښتونو او سيلۍ له امله د ترافیکو پر مخ تړل شوې ده.
دغه وزارت د باميان ولايت شش پل پوستي-حاجي ګک کوتل، يګاولنګ-پنجاب ولسوالي او د آپقول کرمان سړکونو د تړل کېدو خبر هم ورکړی دی.
ورته وخت، غور ولايت کې د کابل-غور، بنديګک، شاتېغ او بندبايان سرکونه هم د تګ-راتګ پر مخ تړلي پاتې دي.
په غزني، فراه، او دايکندي ولايتونو کې هم ځينې سړکونه د ترافيکو پر مخ تړل شوي دي.
ياد وزارت وايي، د دغو لارو د پرانيستلو لپاره یې د څارنې او ساتنې کارکوونکي هڅه کوي او ډېر ژر به پرانيستل شي.
د ټولګټو وزارت له موټر چلوونکو د جدي پاملرنې غوښتنه کړې، چې په يادو لارو دې له اړتيا پرته تګ-راتګ نه کوي او د تګ پر مهال دې خوراکي، ګرمونکي او اړين توکي له ځانه سره ولري.
