کابل (کوه نور، ۱ عقرب ۱۴۰۴): د صنعت او سوداګرۍ وزیر، نورالدین عزیزي د ترکمنستان د نفت او ګازو د ۳۰م نړۍوال نندارتون او کنفرانس په څنډه کې، د ترکمنستان د وزیرانو شورا مرستیال او د ولسمشر له مرستیال بایمراد آنامامدف سره د انرژۍ، برېښنا، صنعت او ودانیزو چارو په برخه کې، لیدنه او خبرې کړې دې.
د صنعت او سوداګرۍ وزارت پر اېکس پاڼه لیکلي، دې لیدنه کې دواړو خواوو د ټاپې ستراتیژیکې پروژې د پر اهمیت ټینګار کړی او دا پروژه یې نه یوازې د افغانستان او ترکمنستان؛ بلکې د ټولې سیمې لپاره مهمه بللې ده.
پر اېکس پاڼه وړاندې لیکل شوي، دواړو خواوو د دې پروژې د پرمختګونو یادونه کړې او څرګنده کړې یې ده، چې دا پروژه به نه یوازې د افغانستان لپاره د انرژۍ د انتقال یوه لاره برابره کړي؛ بلکې د دغه هېواد د یو مهم ترانزیټي مسیر په توګه رول به نور هم پیاوړی کړي.
سرچینې زیاته کړې، د صنعت او سوداګرۍ وزیر د رهبرۍ له لوري د دوه اړخیزو همکاریو پراختیا ته د ملاتړ څرګندونه کړې او د اقتصادي او سوداګریزو اړیکو د پراختیا لپاره یې د موجودو خنډونو د لرې کولو او لازمې آسانتیاوو د برابرولو پر اړتیا ټینګار کړی دی.
نوموړي همداراز ترکمنستان کې د افغان سوداګرو ستونزې هم مطرح کړې او غوښتنه یې کړې، چې هغو قضیو ته دي رسیدګي وشي، چې افغان سوداګر له پیسو ورکولو وروسته هم نه دي توانېدلي خپل مالونه ترلاسه کړي.
دا لیدنه د متقابل تفاهم او همکارۍ په فضا کې ترسره شوې او دواړو خواوو د نږدې اړیکو د دوام او د یادو شویو موضوعاتو د تعقیب غوښتنه کړې ده.
