د ظاهر قدیر د کورنۍ غړو ویلي چې د نوموړي د موضوع په تړاو یې د بهرنیو چارو له سرپرست وزیر امیر خان متقي سره لیدل شوي دي.
د ظاهر قدیر وراره جلال قدیر له رسنیو سره په خبرو کې ویلي چې امیر خان متقي یې د کاکا د موضوع د جدي څېړلو په اړه دوی ته ډاډ ورکړی دی.
د قدیر پر وینا متقي ویلي چې سرپرست حکومت د هېواد شخصیتونو ته درناوی لري او د هر افغان عزت ته ژمن حکومت دی.
نوموړي د امیر خان متقي له قوله ویلي چې د ظاهر قدیر قضیه به په جدي توګه څېړل کېږي او د اسلامي اُصولو، ملي ارزښتونو او عدالت په شتون کې به لازم اقدامات ترسره کړي.
هغه همداراز ویلي چې سرپرست حکومت تر خپلې وسې کوښښ کوي چې یاده موضوع د انصاف او ملي تفاهم له لارې حل کړي.
په همدې حال کې د بهرنیو چارو وزارت د سیاسي چارو دریم مرستیال ذاکر جلالي پر اېکس پاڼه لیکلي چې د یاد وزارت سرپرست په قطر کې د سرپرست حکومت سفارت ته دنده ورکړې چې دغه موضوع دې له کېنیا سره په همغږۍ وڅاري.
کېنیا کې د ظاهر قدیر تر نیول کېدو درې اوونۍ وروسته هم سرپرست حکومت په رسمي توګه ددې موضوع په اړه څه نه دې ویلي.
ظاهر قدیر چې د پخوانۍ ولسي جرګې مرستیال و نږدې درې اوونۍ وړاندې کېنیا کې د وسلو او نشه یې توکو د قاچاق په تور نیول شوی دی.
نوموړی تېره اوونۍ د پنج شنبې پر ورځ د کېنیا پلازمېنې نایروبي کې محکمې ته وړاندې شو خو د دوسیو د نا بشپړوالي په صورت کې یې پرېکړه وځنډول شوه.
د یادونې وړ ده چې د پخوانۍ ولسي جرګې د مرستیال ظاهر قدیر وکیل بې بې سي ته ویلي چې پر نوموړي لګېدلي تورونه سیاسي انګېزه لري.
