د قطر لومړي وزير محمد بن عبدالرحمن له سيايناين سره خپلې تازه مرکه کې کندهار ته د خپل وروستي سفر ځينې جزيات شريک کړي دي.
هغه ويلي، د طالبانو رهبري ته مې په قندهار کې وویل، که غواړئ، چې د نړۍوالې ټولنه برخه و اوسئ؛ باید له مونږ سره يو ځای پر ځينو مسایلو کار وکړئ.
هغه زياته کړې، چې دې کتنه کې دواړو لورو موافقه وکړه، چې غیر دولتي موسسو کې د ښځو د کار او ځينو نورو برخو کې پرمختګونه وشي.
نوموړي ويلي: «"ما قندهار کې په واضحه توګه وویل چې که طالبان غواړي د نړیوالې ټولنې برخه شي، باید همکاري وکړي. تاسو باید له موږ سره یوځای کار وکړئ ترڅو د قطر په څیر یو اسلامي او عصري هیواد ولرئ.»
هغه زياته کړه، د افغانستان اوسنیو چارواکو ته یې وریاده کړې، چې قطر هم يو اسلامي هېواد دی؛ خو ښځې اجازه لري او دوی د ټولنې فعاله برخه ده.
عبدالرحمن ويلي، چې د قطر په پرمختګ کې ښځې مهم رول لري او د وزارتونو او سفارتونو د مشرتابه په څوکيو کار کوي.
د قطر د لومړي وزير په وينا، چې دغه هېواد کې د لوړو زده کړو په برخه کې د نارینه وو په پرتله د ښځو شمېر زيات دی.
محمد بن عبدالرحمن الثاني د روان کال په مې میاشت کې کندهار ته تللی و او د راپورونو له مخې چې هغه د دې سفر پر مهال د حکومت له مشرتابه، ملا هبة الله اخندزاره سره هم کتلي وو.
