د قوشتېپې کانال د پروژې مسوول سيد ذبيح الله ويلي، د قوشتېپې کانال د دويم فاز چارې ۵۸ سلنه بشپړې شوي او اوس مهال د فارياب ولايت اندخوي ولسوالي کې يې د کيندنې چارې ۱۳۰ کيلو مترو ته رسېدلې دي.
د ده په خبره، د دغه کانال په دويم فاز کې څه باندې ۳۵۰۰ کسان او درې زره ماشينري کار کوي چې د ۲۰ ميليارده افغانيو په ارزښت به د روان کال تر پايه بشپړې شي.
د ياد کانال د جوړېدو په دريم پړاو کې به د ياد کانال په اوږدو کې پرتو ځمکو ته فرعي کانالونه هم جلا شي چې ورسره به ۵۵۰ زره هکټاره ځمکه خړوبه شي.
ياد کانال ته به د امو سیند د اوبو د راګرځولو سربېره افغانستان په نږدې راتلونکي کې د غنمو په صادروونکي هېواد بدل او ورسره به ګڼ شمېر زراعتي فارمونه هم جوړ شي.
