د ټرانسپورت او هوایې چلند وزارت تر چتر لاندې د هوا پېژندنې ادارې د هېواد په ۱۹ ولایتونو د واورې او باران ورېدلو خبر ورکړی دی.
یاد ریاست د یوې خبرپاڼې په خپرولو سره ویلي چې سبا دوشنبه(د حوت ۶مه) په هرات، فرا، نیمروز، هلمند، زابل، کندهار، ارزګان، دایکندي، غور، بادغیس، فاریاب، سرپل، بامیان، سمنګان، میدان وردګ، پکتیا، غزني، جوزجان او بلخ ولایتونو کې به باران او واوره وورېږي.
یاد ریاست وړاندوینه کړې چې د واورې د ورښت اندازه به له ۱۰-۴۰ سانتي مترو او د باران هغه به له ۱۵-۵۰ ملي مترو پورې ورسېږي.
همداراز د هوا پېژندنې ریاست د هېواد په شمال لویدیځ، لویدیځ، جنوب او مرکزي ولایتونو کې د سختو بادونو د لګېدلو په اړه خبرداری ورکړی دی.
د یادونې ده چې د یادو بادونو سرعت به په یوه ساعت کې له ۵۰-۱۰۰ کیلو مترو پورې ورسېږي.
