کابل (کوه نور، ۲ سنبله ۱۴۰۴):
د کورنیو چارو وزارت اړوند د پاسپورت ریاست اعلان کړی چې تر دې وروسته هېواد کې بې سرپرسته ماشومانو، د محکمې له لورې محکومو وګړو او هغه خلکو ته پاسپورتونه نه ورکول کېږي چې له هېواده بهر ته له تللو منع شوې وي.
د پاسپورت ریاست نن ورځ د یوې اعلامې په خپرولو سره ویلي، یادو شویو کسانو لپاره به د پاسپورتونو وېشل په مکمل ډول ودرول شي.
د دې پالېسۍ له مخې، هغه ډله وګړي چې د حکومت د محکمو له لورې په قضایې، مدني او یا هم په سوداګریزو قضیو کې محکوم شوي تر دې وروسته د پاسپورتونو د اخېستلو اجازه نه لري.
همدارنګه هغه ډله ماشومان چې قانوني سرپرست ونه لري هم د پاسپورت ترلاسه اجازه نه ورکول کېږي.
د پاسپورت ریاست په اعلامه کې راغلي، هغه کسان چې د برېښنایې سیستمونو BAIF او بایومټریک لخوا یې د وتلو بندیز تاید شوی د پاسپورت له ورکولو به یې انکار وشي.
یاد ریاست ویلي، د دې پرېکړې له کولو یې موخه، د هویت اسنادو د صادرولو کابو کول او د څارنې پروسه پیاوړې کول دي؛ ترڅو له پاسپورتونو د ناوړه ګټې اخېستنې مخه ونیول شي او د هېواد امنیت کلک وساتل شي.
