کابل (کوهنور ۲۴ سرطان ۱۴۰۴): د پنجشېر ولایت ځایي مسوولانو خبر ورکړی چې د دغه ولایت له څلور بېلابېلو کانونو له دوه زره او ۲۳۵ قېراطه زمرودو ډېر د ازادي داوطلبۍ له لارې پلورل شوي دي.
د دغه ولایت مطبوعاتي دفتر نن ورځ " سه شنبه، د جولای ۱۵مه" د یوې خبرپاڼې په خپرولو سره ویلي، د یاد ولایت له څلورو کانونو دا راویستل شوي زمرود په یوه رسمي داوطلبۍ کې د ۱۷۷ زره او ۳۵۰ امریکایې ډالرو په ارزښت په کورنیو سوداګرو پلورل شوي دي.
خبرپاڼه کې راغلي، په دې داوطلبۍ کې د قېمتي ډبرو سوداګرو او ځایې پانګه والو ګډون کړی و او یادو مراسمو کې د داوطلبۍ پر شفافیت او د کورني تجارت پر پیاوړتیا ټینګار شوی دی.
د پنجشېر والي محمد اغا حکیم چې په دې مراسمو کې یې ګډون کړی وو د کانونو د استخراج بهیر ستایلی او او دا ګام یې د سیمه ېیز اقتصاد د ودې لپاره مهم بللی دی.
نوموړي ویلي، د کانونو په معیاري او تخنیکي ډول د استخراج لپاره مشخصې برنامې په لاس کې لرو.
پنجشېر کې د قېمتې ډبرو په ځانګړي ډول د زمرودو د استخراج بهیر چې له کلونو راهیسې په ټپه ولاړ و یو ځل بیا فعال شوی دی چې ورسره ګڼ شمېر خلکو ته د کار کولو زمینه برابره شوې ده.
ځایې مسوولانو ویلي، د کانونو د استخراج بهیر نه یواځې ځوانانو ته د کار زمینه برابره کړې؛ بلکې د سیمې خلکو ته یې د پام وړ سوداګریز فرصتونه هم برابر کړي دي.
