کابل (کوه نور، دلوې ۵مه ۱۴۰۴): د پېښو پر وړاندې د مبارزې او چمتووالي ملي ادارې د باوري نړۍوالو بنسټونو د معلوماتو پر بنسټ خبرداری ورکړی، چې افغانستان به په راتلونکې يوه اوونۍ کې له بېلابېلو طبيعي ګواښونو سره مخ وي.
د يادې وړاندوينې له مخې، د ورښتونو کمښت او د واورو د اوبو نشتوالی په بدخشان ولايت کې د غيرعادي وچکالۍ د دوام لامل شوی او دا وچکالي د هېواد د شمالي ولايتونو په ځينو برخو کې هم د پراخېدو په حال کې ده.
په ورته وخت کې، په مرکزي او ختيځو ولايتونو کې له منځنۍ اندازې تر درنو بارانونو او واورو د اورېدو اټکل شوی، چې له امله يې د سېلابونو او سختو واورو د ورېدو خطر زيات شوی دی.
یادې ادارې همدارنګه ویلي، د هېواد په ډېری سيمو کې د هوا تودوخه به تر عادي کچې ټيټه وي او د يخنۍ څپه په ځانګړي ډول د اوونۍ په لومړيو ورځو کې کولای شي ماشومان او زاړه کسان له جدي ګواښ سره مخ کړي.
