د ټولګټو چارو وزارت وايي، د کابل - جلال آباد لويې لارې اصلي مسير د هر ډول ترافیکو پرمخ پرانیستل شو.
دغه وزارت په یوې خبرپاڼه کې ليکلي، چې دغه مسیر د دوشنبې ورځ «د اکتوبر ۲یمه» ماښام ناوخته د دې وزارت د شته پرسونل او ماشينري څخه په ګټې اخیستنې سره، د تېرو درې ورځنيو هڅو وروسته پرانيستل شو.
خبرپاڼه زياتوي، چې دامهال هر ډول موټر کولای شي، د يادې لويې لارې په اصلي مسير تګ راتګ وکړي.
د کابل – جلال آباد لویه لار دوه هفتې مخکي د کابل ولایت د دروازې په درې کیلومتري کې د غر ښویېدني له امله د دوو ورځو لپاره د موټرو د تګ راتګ پرمخ بنده شوه.
ددې لارې له بندېدو سره همهاله ټولګټو وزارت د دفاع وزارت په همکارۍ د موټرو د تګ راتګ لپاره بدیل فرعي مسیر جوړ کړی وو.
که څه هم لاره وخت ناوخت د تګ راتګ لپاره خلاصېده؛ خو د موټرو ګنې ګوڼې خلک له دېرو مشکلاتو سره مخ کړي وو.
د دې لارې موټر چلوونکي او مسافر له حکومت غواړي، چې د کابل - جلال اباد د دويم سړک په جوړېدو دې کار ژر تر ژره بيا پیل کړي، چې د عاجلو پېښو پر مهال خلک له ستونزو سره مخ نه شي.
