د پاکستان کراچۍ ښار کې د افغانستان کونسل عبدالجبار تخاري وايي، په وروستیو ۱۵ ورځو کې له ۹۰۰ ډېر افغان کډوال د پاکستاني پولیسو له خوا نیول شوي دي.
هغه زياتوي، په نیول شويو کسانو کې يو شمېر داسې کسان هم شته، چې په دې هېواد کې د اوسېدلو قانوني اسناد له ځان سره لري.
تخاري وايي، د پاکستاني پوليسو له لوري د افغانانو د نيولو لړۍ اوس هم روانه ده.
نوموړی د پاکستان له حکومت غواړي، چې د افغان کډوالو د نیولو لړۍ دې ژر تر ژره بنده کړي او نيول شوي کډوال دې هم خوشې کړي.
د تخاري په وينا، کراچۍ کې د افغانستان د کونسلګرۍ په هڅو له نیول شويو ۹۰۰ افغانانو څخه یې ۲۰۰ بېرته خوشې شوي دي.
د پاکستان بېلابېلو ښارونو کې د افغانانو د نيولو لړۍ وروسته له هغې چټکه شوه، چې د دې هېواد سرپرست لومړي وزير د غیر قانوني کډوالو د نيولو امر وکړ.
د پاکستان لومړي وزير انورالحق کاکړ وویل، هغه افغانان چې اسناد نه لري له نيولو وروسته به بېرته خپل هېواد ته انتقال کړای شي.
د پاکستان د حکومت له لوري د افغانانو نيول کېدو ته د افغانستان اوسني حکومت هم غبرګون ښودلی دی.
د افغانستان د اطلاعاتو او کلتور وزارت سرپرست، خیرالله خيرخواه د پاکستان د ځانګړي استازي اصف دراني په مشرۍ پلاوي سره د کتنې پر مهال ویلي، چې له افغان کډوالو سره بايد ناوړه چلند بس او د نیولو لړۍ یې ودرول شي.
خيرخواه زياته کړې، له هغه څه باید ډډه وشي چې د دواړو هیوادو پر اړیکو منفي تأثیرات کوي.
